Zille grafstil oor Ramphele
2013-02-17 09:36
Kaapstad – Helen Zille, leier van die Demokratiese Alliansie, wou nie kommentaar lewer oor die politieke planne van die sakevrou Mamphela Ramphele nie.
Zille het die naweek 'n byeenkoms van die Suid-Afrikaanse Nasionale Redakteursforum in Kaapstad toegespreek.
Sy en Ramphele ken mekaar goed en het jare gelede saam by die Universiteit van Kaapstad gewerk. Die sakevrou het ook vroeër die week met onmiddellike effek as voorsitter van Gold Fields bedank.
Ramphele sal na verwagting môre by die vroue-tronk by Constitution Hill in Johannesburg, aankondig of sy ‘n nuwe politieke party gaan stig of nie.
Dit kom ná maande se bespiegeling oor die moontlikheid dat dié akademikus en aktivis, haar by die DA gaan aansluit, of haar eie politieke party op die been gaan bring.
Gerugte het vroeër die ronde gedoen dat sy en die party nie ’n ooreenkoms kon bereik nie, en sy nou haar eie party gaan stig.
Die DA was deel van 'n groep van agt opposisieparty wat vroeër 'n nuuskonferensie gehou het om hul uiterste teleurstelling met pres. Jacob Zuma se staatsrede te betuig.
Die ander partye betrokke was die African Christian Democratic Party, Azanian People's Organisation, Cope, die Inkatha Vryheidsparty, die Vryheidsfront Plus, die United Christian Democratic Party, en die UDM.
Volg Nuus24 op Twitter
- SAPA
