Zille: Zuma, Malema moedig moord aan
2010-03-13 04:20
Kaapstad - Pres. Jacob Zuma se weiering om homself te distansieer van Julius Malema se woorde "maak die boere dood, hulle is verkragters" laat dit blyk hy ondersteun Malema se "aanmoediging van moord op Suid-Afrikaners."
Dit was Vrydag die mening van die DA-leier, Helen Zille.
Zille het in haar weeklikse nuusbrief gesê sy het 'n skrywe aan Zuma gerig waarin sy dit duidelik maak dat haatspraak onkonstitusioneel is.
Haar brief vra die president ook wat hy beplan om daaraan te doen.
Zuma se stilswye suggereer dat hy en die ANC Malema se moordboodskap goedkeur," het Zille geskryf.
Die ANC-jeugligaleier staar aanklagte van haatspraak in die gesig nadat hy “skiet die boere, hulle is verkragters”, Dinsdag by die Universiteit van Johannesburg voor 'n groot groep studente gesing het.
Zuma het Malema Vrydag in ‘n onderhoud verdedig en gesê die jeugliga-president het "leierskapskwaliteite en gee om vir die mense."
“Ek het nie gesê dat hy reg is nie, maar ek sê dat hy ‘n reg het om kwessies uit te lig. As ons Malema keer kan jy sê dat apartheid teruggekeer het,” het Zuma aan die Mail&Guardian gesê.
- Sapa