Zille: Wes-Kaap se begroting te knap
2009-09-09 09:18
Rajaa Azzakani
Kaapstad - Vroeë aanduidings is dat die Wes-Kaapse regering sy begroting met byna R1 miljard kan oorskry.
Die regering is boonop “diep bekommerd” oor die impak van nasionale salaris- en beroepspesifieke vergoedingsooreenkomste (OSD-betalings).
Helen Zille, premier, het gister in ’n sitting in die provinsiale parlement gesê die regering is veral bekommerd dat die provinsie die koste van dié swaar las sal moet dra sonder die nodige bronne van inkomste.
“Ons moet mandate wat nie finansier is nie vermy,” het Zille aan LPW’s en lede van die Nasionale Raad van Provinsies gesê.
Sy het gesê die provinsie se begroting is uiters knap en dat die vroeë aanduidings toon die provinsie kan sy begroting met 3,4% van sy hoofbegroting oorbestee.
Ondanks dit is baie aandag die laaste nege maande geskenk aan voorbereiding van die 2009-’10-begroting om doeltreffende besteding te verbeter en om vermorsing en onbehoorlike uitgawes te verminder.
“Ons het reeds R430 miljoen van vanjaar se begroting gesny en ons het vir die eerste kwartaal binne ons teikens bestee.”
Zille het terselfdertyd die onderskeie provinsiale departemente se sleutelprioriteite uitgelig.
Die Wes-Kaapse departement van onderwys sal prestasiebestuur vir onderwysers, skoolhoofde en amptenare moet verbeter, terwyl ’n omkeerstrategie vir die provinsie se 74 disfunksionele skole ontwikkel en ingestel gaan word.
Meer geld gaan beskikbaar gestel word vir hospitale en klinieke en die totale begroting vir infrastruktuur gaan verhoog word.
Zille het gesê R18 miljoen gaan bygevoeg word tot die begroting van die departement van maatskaplike ontwikkeling om die diensvoorwaardes van maatskaplike werkers te verbeter.
’n Strategiese plan sal saamgestel en gefinaliseer word oor dwelmmisbruik.
“Geen ander provinsie staar die uitdagings in die gesig soos ons met dwelmmisbruik nie. Families word geskeur hierdeur en die langtermyn-implikasies is baie erg. Ons moet ’n manier vind om saam te werk om dit aan te spreek.”
Gevolglik sal dit dus ook een van die departement van gemeenskapsveiligheid se hoogste prioriteite wees om dwelmhandelaars aan te keer.
Die provinsiale regering kyk ook na ’n nuwe sagteware-stelsel.
- Die Burger