Zille, De Lille gekap oor onwettige borde
2011-11-20 10:56
Kaapstad – Die gort is gaar oor twee onwettige, uitlokkende reklameborde in Kaapstad.
Midde-in die twis oor die mansklub Mavericks se advertensies is Helen Zille, Wes-Kaapse premier, en Patricia de Lille, burgemeester van Kaapstad.
Mavericks skoei sy reklameveldtog op ’n parfuum wat mans ’n alibi gee dat hulle “laat gewerk het”, terwyl hulle eintlik die geselskap van sexy en feitlik kaal nagklubdansers opgesoek het.
Een reklamebord is op die N1 aangebring (die hoofaar na die stad) en die ander in Kloofnekpad wat die stad met Kampsbaai verbind.
Zille het Woensdagaand op die kritiek teruggetweet die Gesagsliggaam vir Reklamestandaarde ondersoek die saak.
De Lille se kantoor het gesê die onwettige oprigting is onder die aandag van die advertensiemaatskappy (in diens van Mavericks) gebring.
Die Stad Kaapstad sê die reklameborde is onwettig omdat dit sonder toestemming opgerig is, maar dit kan nie afgehaal word sonder om ’n regsproses te volg nie.
Errol Naidoo, direkteur van die Instituut vir Gesinsbeleid, het Saterdag gesê dis twak.
“Die kennisgewingbord is onwettig opgerig én die inhoud daarvan is ’n vergryp van vroue- en kinderregte ingevolge wetgewing oor rolprente en publikasies.
“Wat keer hulle om dit af te haal?” wou hy weet.
Die reklamebord-twis het gelei tot aantygings van skynheiligheid teen Zille. Dit kom ná haar opmerkings verlede week op ’n Wes-Kaapse gesondheidsberaad dat MIV-positiewe mense wat wetende veelvuldige seksmaats het, van moord aangekla moet word.
Zille is aangevat hieroor deur Nathan Geffen en Gavin Silber, vigsaktiviste, asook Paul Berkowitz (ekonoom) en prof. Pierre de Vos (grondwetkenner).
Volg Nuus24 op Twitter
- Rapport