Zapiro pessimisties oor SA politiek

2012-12-05 09:32

Johannesburg – Die spotprentkunstenaar Jonathan Shapiro, beter bekend as Zapiro, sê wat die land se politiek betref, het hy min om oor optimisties te wees.

Zapiro, wat die Kaapse Persklub in Nuweland toegespreek het, het gesê die regerende party inspireer nie positiwiteit nie.

RSG berig Zapiro het toegegee dat daar individue in die kabinet en in die samelewing is wat goed vaar.

Die Burger berig die spotprentkunstenaar het ook ’n oorsig van sy mees omstrede spotprente gegee en sy politieke insigte met die gehoor gedeel.

“Ek is glad nie positief oor Mangaung nie. Die proses in die aanloop tot Mangaung is ontmoedigend,” het hy gesê.

In ’n verwysing na een van sy spotprente van pres. Jacob Zuma wat in die Uniegebou deur sy eie swart skaduwee (korrupsie) gejaag word, het Zapiro gesê: “Is dit nie ironies dat ons met ’n president sit wat ’n tweede termyn nodig het om uit die tronk te bly nie?”

Volgens die dagblad het die kunstenaar bygevoeg hy hoop ‘n linkse faksie, soortgelyk aan Cope, sal ná die ANC se leierskongres van dié party wegbreek.

Volg Nuus24 op Twitter