Zamdela-inwoners soek vermiste familielede

2013-01-28 10:50

Zamdela – Frustrasie in die Zamdela-woonbuurt in Sasolburg neem toe nadat verskeie inwoners ná gewelddadige betogings in die gebied verdwyn het, berig Eyewitness News.

Sommige inwoners het die naweek na hul familielede gaan soek, maar hul soektogte het niks opgelewer nie.

Die polisie het ook onder skoot gekom omdat hulle glo niks doen om die inwoners te help nie.

Meer as 200 mense sal na verwagting vandeesweek in die hof verskyn nadat goedere wat vermoedelik uit winkels gesteel is tydens die betoging, in hul besit gevind is.

Vier mense is volgens die polisie in verlede week se gewelddadige betogings dood. Inwoners was ontsteld oor 'n beplande samesmelting van die Sasolburg- en Parys-munisipaliteite.

"Dit is moontlik dat daardie familielede dalk tydens die geweld gesterf het, maar daar is nog hoop dat hulle in die hof kan verskyn," het Lucky Malebo, wat die betoging gelei het, gesê.

– Volg Nuus24 op Twitter