Zamdela-geweld: Polisie, betogers beseer
2013-01-23 11:38
Johannesburg – Afgesien van twee sterftes, het nege mense in die gewelddadige betogings in Zamdela, Sasolburg, beserings opgedoen.
Die polisie sê twee van die beseerdes is polisiebeamptes wat in ‘n Nyala gesit het toe die voertuig Maandag deur betogers oorval is.
Kol. Motantsi Makhele, ‘n woordvoerder vir die polisie in die Vrystaat, sê die ander beseerdes is betogers. Hy sê minstens een van hulle is in ‘n kritieke toestand.
Inwoners het die naweek oproerig geraak oor ‘n voorstel om Sasolburg- en Parys se munisipaliteite saam te smelt.
Richard Baloyi, minister van samewerkende regering en openbare sake, het intussen aangekondig dat die samesmelting nie onmiddellik sal voortgaan nie.
Polisiebeamptes het Woensdag aangehou om die situasie in die township dop te hou.
Makhele sê die situasie is onder beheer en dat geen geweld deur die nag aangemeld is nie.
“Die enigste ding wat steeds oorbly, is dat sommige strate nog ontoeganklik is.”
‘n Betoger is Dinsdag by die Zamdela-polisiestasie doodgeskiet toe betogers met die polisie gebots het.
Die polisie sê ‘n ander betoger is vroeër dieselfde dag deur ‘n motoris geskiet, nadat ‘n groep betogers die pad voor hom versper het.
Makhele sê hy kan nie ‘n berig in The New Age – dat drie mense reeds dood is – bevestig nie.
‘n Joernalis se motor is ook met klippe bestook, terwyl ‘n kameraman met ‘n mes gedreig is.
Meer as 200 mense is in hegtenis geneem sedert die geweld die naweek uitgebreek het.
Volg Nuus24 op Twitter
- SAPA
