Zambië gee krag vir WB
2010-01-10 04:51
Lusaka – Zambië het ingestem om elektrisiteit aan Suid-Afrika te voorsien tydens vanjaar se wêreldbeker sokkertoernooi om sodoende die kanse op kragonderbrekings te verminder, het die hoof van dié land se kragvoorsiener, Zesco, gesê.
Suid-Afrika se kragstasies is reeds vir meer as twee jaar onder enorme druk en aan die begin van 2008 het kragonderbrekings die land gereeld in die donker gelaat.
Tog het Eskom gesê dat daar genoeg elektrisiteit vir vanjaar se wêreldbeker sokkertoernooi behoort te wees.
Cyprian Chitundu, die waarnemende besturende direkteur van Zesco, het op die staatskanaal, ZNBC, gesê Zambië sál krag aan Suid-Afrika voorsien maar dat die hoeveelheid afhang van Zambië se oortollige elektrisiteit sowel as Suid-Afrika se aanvraag.
Zambië genereer sowat 1 400 megawatt elektrisiteit en gebruik rondom 800 MW, maar aanvraag kan gedurende spitstye na 1 500 MW styg.
- Reuters