Xenofobie steeds net gerugte sê Zuma
2010-07-12 21:28
Johannesburg – Dreigemente van die uitbreek van xenofobiese geweld in Suid-Afrika is steeds net gerugte, het pres. Jacob Zuma Maandag gesê.
“Ek is nie seker of daar al dreigemente van xenofobiese geweld was nie. Maar ek weet daar was gerugte wat aangemeld is,” het hy aan joernaliste in Sandton gesê.
Volgens hom het die regering ‘n ministriële kommissie op die been gebring om die situasie te hanteer.
“Die regering is in beheer van die situasie en ek is seker mense hoef nie bang te wees nie omdat ons na hul sekuriteit sal omsien.”
Zuma het gesê daar is nog nie konkrete bewyse van xenofobiese aanvalle nie.
Daar is Maandag berig dat daar aanvalle op immigrante in die Wes-Kaap was.
Altesaam 62 mense het in 2008 gesterf en 1500 was haweloos gelaat nadat xenofobiese aanvalle in Gauteng begin het.
- Volg Nuus24 op Twitter.
- SAPA