Wrakke van vermiste vliegtuie gevind
2011-08-16 08:37
Tzaneen – Die wrakke van die twee Albatros-vliegtuie wat Sondag in George's Valley naby Tzaneen verdwyn het, is gevind.
Johnny Smit van die Suid-Afrikaanse soek- en reddingsentrum het Dinsdagoggend aan News24 bevestig dat reddingswerkers op die toneel is.
Die vliegtuie het vermoedelik in 'n berg in die Maake-gebied vasgevlieg. Dit wil in dié stadium voorkom of niemand die ongeluk oorleef het nie.
Soek-en-reddingspanne is met helikopters na die toneel geneem, het Beeld se Sonja Carstens berig.
Die vliegtuie, met 'n totaal van 13 mense aan boord, was van Tzaneen na die Randse Lughawe in Gauteng onderweg.
– Volg Nuus24 op Twitter