Wouter Basson se verhoor wéér uitgestel
2012-09-25 15:11
Pretoria – Die verhoor van dr. Wouter Basson, hartspesialis en biologiese oorlogskenner, voor die tugkomitee van die Raad op Gesondheidsberoepe van Suid-Afrika (RGSA), is wéér uitgestel, dié keer omdat regter Frikkie Eloff siek is.
'n Getuie in die saak, die voormalige weermag-generaal Neil Knobel, wat Dinsdag ondervra sou word, kon ook nie die verhoor bywoon nie nadat hy vroeër vandeesmaand 'n ope-hartoperasie ondergaan het.
Knobel het voor die tugkomitee getuig voordat die verhoor in Maart uigestel is.
Prof. Jannie Hugo, voorsitter van die ondersoek, het die saak tot 6 en 7 Desember uitgestel.
Die partye sal in Oktober 'n vergadering hou waar die gesondheid van die twee bespreek sal word.
Basson se regsverteenwoordiger, Jaap Cilliers, het vroeër voorgestel die saak moet tot Maart volgende jaar uitgestel word.
Hugo het aangedui dat 'n plaasvervanger vir Eloff gevind moet word indien hy nie gereed is om die saak verder in Desember aan te hoor nie.
Hy het gesê indien 'n nuwe regter die saak oorneem, sal daardie persoon eers meer tyd moet kry om vertroud met die saak te word.
Longontsteking is by Eloff gediagnoseer.
Basson word onder meer daarvan beskuldig dat hy gehelp het met die vervaardiging van Mandrax en Ecstasy, traangas, sianied-kapsules en middels vir oorgrens-operasies.
Basson het aan die komitee gesê dat die middels vir navorsing vervaardig is en nooit toegedien is nie.
– Volg Nuus24 op Twitter.
- SAPA
