Wouter Basson se verhoor duur voort
2011-09-28 09:08
Johannesburg – 'n Ondersoek na dr. Wouter Basson se beweerde onetiese optrede word Woensdag vir 'n derde dag in Pretoria voortgesit.
Dr. Steven Miles, 'n praktiserende internis en dosent aan die Universiteit van Minnesota, het gesê Basson het teenstrydig met die wette van die menslikheid opgetree toe hy hoof van die Project Coast – die weermag se destydse projek vir chemiese en biologiese oorlogvoering – was.
Miles het gesê Basson het het op 'n onetiese wyse sy mediese lisensie behou terwyl hy toetse wat deel van dié program was, gemonitor het.
In die proses het hy verskeie internasionale en plaaslike mediese etiese kodes oortree.
Die Raad vir Gesondheidsberoepe van Suid-Afrika (RGB) ondersoek Basson se gedrag terwyl hy die hoof van Project Coast was.
Luidens die klagstaat het Basson mandrax en ecstacy vir die apartheidsregering vervaardig,
Die RGB ondersoek ses aanklagte van onetiese of onprofessionele gedrag wat verband hou met die beweerde skending van menseregte tydens die apartheidera. Dié aanklagte is in 2007 teen hom gebring.
Die raad het Maandag besluit om nie voort te gaan met sekere aanklagte wat teen Basson gebring is nie.
Dít sluit in die aanklag wat verband hou met Basson wat sy aanstelling as hoof van Project Coast aanvaar het. Die raad het ook die derde aanklag en elemente van die tweede aanklag laat vaar. Albei hou verband met toetse wat op troepe en die polisie se taakmag gedoen is.
Basson praktiseer tans as 'n kardioloog in Durbanville, Kaapstad.
Die Pretoriase hooggeregshof het verlede jaar 'n aansoek van Basson, wat die RGB verhoed om met die ondersoek voort te gaan, verwerp. Basson wou hê die hof moet die verhore onwettig, onredelik en onregverdig verklaar.
Basson is in April 2002, ná 'n verhoor van 30 maande, vrygespreek op meer as 40 aanklagte van ondermeer moord, bedrog en dwelmhandel. Die staat wou teen dié uitspraak appelleer, maar die appèlhof het 'n herverhoor in 2003 geweier.
– Volg Nuus24 op Twitter
- SAPA