Wouter Basson: ‘Dit was dwelms of keelaf’
2011-10-02 06:44
Johannesburg – Dr. Wouter Basson is die afgelope week met oudpres. Nelson Mandela vergelyk.
Sy
regspan voer ook aan hy het juis eties opgetree deur dwelms vir die
oorgrens-ontvoerings van ANC-, PAC- en Swapo-lede te verskaf.
Basson
staan tereg op aanklagte van onprofessionele en onetiese gedrag in ’n
verhoor deur die Raad vir Gesondheidsberoepe (RGB).
Die verhoor berus op wat Basson self getuig het in sy strafverhoor en daardie feite is nie in geskil nie.
Maar
adv. Jaap Cilliers SC het namens Basson aangevoer hy het die
aktiwiteite in sy hoedanigheid as ’n soldaat en nie as dokter nie
uitgevoer.
Dit val dus buite die grense van mediese gedrag waaroor die RGB kan beslis.
Cilliers
het gesê die prokureursorde wou destyds vir Mandela van die rol skrap
omdat hy vir politieke doeleindes wette oortree en ook ander aangehits
het om dit te doen.
Die hof het aanvaar Mandela het sy politieke bedrywighede in ’n persoonlike hoedanigheid gevoer en nie as ’n prokureur nie.
Prof.
Steven Miles, ’n Amerikaanse etiekkenner wat teen Basson getuig het,
het gesê hy is “eenvoudig dronkgeslaan” dat Cilliers Basson met Mandela
wil vergelyk.
Nóg ’n argument van die verdediging was dat Basson
eintlik eties opgetree het deur dwelms te verskaf vir “twee tot vier”
oorgrens-ontvoerings.
Die dwelms was die geskikste opsie. Die alternatief was om ’n veiligheidswag keelaf te sny of te skiet, beweer Basson.
Maar Miles het gesê dwelms moet net in die beste belang van die ontvanger toegedien word.
“Dit kan nie in iemand se beste belang wees om ontvoer te word nie.”
Cilliers
het gesê hulle gaan nog getuienis lei dat sommige middels ook in
plaaslike skarebeheer gebruik is. Dit is nie oneties om wetstoepassers
by te staan nie, het hy aangevoer.
In klag twee word Basson
beskuldig dat hy as projekoffisier van Delta G mandrax, ecstacy, ’n
hallusogeen (BZ) en die traangasse CS en CR “op groot skaal” vervaardig
het.
Basson het destyds getuig CR is indirek aan die weermag
verskaf vir gebruik in onluste sodat selfs die weermag nie geweet het
dit word eintlik in Pretoria vervaardig nie.
Die middel laat iemand só sleg voel dat hy net wil huis toe gaan, “gaan lê en wil doodgaan”.
BZ het verskeie variasies wat verskillende uitwerkings kan hê, het hy getuig.
Die
een variasie maak die teikens heeltemal passief sodat hulle ondanks
groot gevaar net sal gaan sit en lees of met ’n vriend gesels.
’n Ander variasie maak die teiken weer so aggressief dat “hy sy eie ma sal begin skiet”.
Ná die verhoor het Miles gesê die verhoor is ’n “enorm belangrike saak regoor die wêreld”.
Dit
is ook sedert die vervolging van die destydse Nazi-dokters een van die
prominentste verhore waarin presedente geskep kan word.
- Rapport