Woolworths knak
2010-10-20 16:52
Kaapstad – Die herrie rondom godsdienstige tydskrifte wat van Woolworths se rakke sou verdwyn, het Woensdagmiddag met ‘n omkeer van dié besluit deur die supermarkgroep geëindig.
Woolworths is deur woedende Christene op Facebook en in die media gebombardeer nadat die supermark die oggend aangekondig het dat hulle onder andere nie meer Christelike tydskrifte gaan verkoop nie.
In ‘n verklaring wat die winkelgroep Woensdag op hul Facebook-blad geplaas het, het hulle gesê dat hulle besluit het om die godsdienstige tydskrifte terug op die rakke te plaas.
“Ons is oorweldig deur die reaksie. Dankie aan almal wat ons ondersteun het – ons waardeer dit regtig,” lui die verklaring.
“Dit was nie ons bedoeling om enige geloofsgroepe aanstoot te gee nie. Woolies het groot aansien vir alle gelowe en sal voortgaan om al ons kliënte se gelowe te respekteer.
Die Woolworths Facebook-blad is deur die dag deur duisende ontevrede mense geteiken met sommige gebruikers wat selfs beweer het hulle sal nooit weer by die winkel koop nie.
“Ons kan met trots sê dat ons nog altyd na ons kliënte luister en ons wil regtig hê ons sosiale media-blaaie moet ‘n tweegesprek wees.
“As ‘n handelaar hersien ons gereeld al ons produkte, insluitende tydskrifte, en ons hou produkte aan wat ons kliënte wil koop.
"Julle het geskryf – ons het geluister en het nou besluit om alle tydskrifte terug op die rakke te plaas."
- Nuus24
Kliek hier om na Woolworths se Facebook-blad te gaan
Volg Nuus24 op Twitter