Wolseley-plaaswerkers keer terug werk toe
2012-11-16 15:31
Johannesburg – Sowat 300 plaaswerkers in Wolseley het Vrydag teruggekeer werk toe, het die SA National Civic Organisation (Sanco) gesê.
Vusi Myeki, sekretaris-generaal, het gesê die werkers het ingestem om die staking vir minstens twee weke op te skort totdat 'n besluit oor plaaswerkers se minimumloon gemaak is.
Plaaswerkers in De Doorns staak sedert verlede week en eis 'n daaglikse loon van R150 en beter werkstoestande. Dié staking het vandeesweek na ander dorpe uitgekring.
Die staking duur voort in die ander gebiede in die provinsie.
Agri SA het Vrydag gesê boere in die Wes-Kaap, wie se werkers onwettig staak, moet toegelaat word om te besluit wat die geskikste optrede teen hulle sal wees.
"Wetteloosheid en kriminele aktiwiteite kan nie geduld word nie en die skuldiges moet deur die gewone vervolgingsproses daarvoor verantwoordelik gehou word," het Anton Rabe, hoof van Agri SA se arbeidskomitee, gesê.
Hy het gesê die partye wat deur die staking geraak word, moet saamwerk om sakevertroue en gemoedsrus te herstel sodat die land se beeld herstel kan word.
– Volg Nuus24 op Twitter
- SAPA
