Wolmaransstad-verkragter vasgetrek

2012-09-17 18:33

Johannesburg – ‘n Man wat daarvan beskuldig word dat hy ‘n vrou in Wolmaransstad, in die Noordwes, verkrag het, is Maandagoggend in hegtenis geneem, het die polisie gesê.

Sers. Kelebogile Moiloa sê die 26-jarige vrou het saam met haar kêrel huis toe gestap toe ‘n man hulle oorval het.

Die man het die vrou se kêrel na bewering met ‘n leë bierbottel oor die kop geslaan en haar na ‘n nabygeleë reservoir gesleep.

Die man was nog besig om die vrou te verkrag toe haar kêrel saam met die polisie by die toneel opgedaag het.

Moiloa sê die polisie het die aanvaller vasgetrek nadat hy probeer het om weg te hardloop.

‘n Ander vrou is die vorige dag in ‘n aparte voorval in Wolmaransstad verkrag. Dié vrou het ook saam met ‘n vriend gestap toe die man hulle aangeval het.

Volg Nuus24 op Twitter  

- SAPA