Woede oor penis-spotprent van Zuma

2012-07-06 14:00

Johannesburg – Die ANC se vroueliga het 'n spotprent waarin pres. Jacob Zuma as 'n penis uitgebeeld word, veroordeel.

Jonathan Shapiro, beter bekend as die spotprenttekenaar Zapiro, se spotprent is Vrydag in die Mail & Guardian gepubliseer.

Volgens die vroueliga het hy dié keer te ver gegaan.

"Jonathan Shapiro het te ver gegaan in sy pogings om spotprente te teken," het die liga in 'n verklaring gesê.

In sy spotprent het Zapiro 'n penis met 'n gesig, bene en 'n stortkop wat na homself in 'n spieël kyk, geteken.

Die handtekening van die kunstenaar Brett Murray is in die onderkantste hoek van die spieël en die naam van die Goodman-galery verskyn ook in die spotprent.

Onder die opskrif "The Spear to be raised at Social Cohesion Summit", is ook 'n gedig geskryf wat na Zuma verwys. Volgens die liga is dit 'n belediging vir die mense wat onder apartheid gely het.

Die liga het gesê Shapiro verontagsaam die "genesingsproses" wat tans in Suid-Afrika gebeur.

The Spear is 'n skildery deur die kunstenaar Brett Murray. Die omstrede kunswerk wys pres. Jacob Zuma met sy gulp oop en sy penis blootgestel.

– Volg Nuus24 op Twitter.

- SAPA