Woede oor minister se uitlating oor Afrikaners
2013-02-27 08:17
Johannesburg – Lulu Xingwana, minister van vroue, kinders en gestremdes, het "haar amp misbruik" en het nie die waardigheid en eer wat haar posisie vereis nie, het die Afrikanerbond Woensdag gesê.
"Hierdie minister het bo enige twyfel bewys dat sy nie geskik is om 'n amp te hê in 'n konstitusionele demokrasie nie," het Jan Bosman, sekretaris van die organisasie, in 'n verklaring aangevoer.
Dit volg ná Xingwana aan die Australiese Uitsaaikorporasie (ABC) gesê het jong Afrikanermans word grootgemaak om te glo dat hulle vroue en kinders "besit".
"Jong Afrikanermans word grootgemaak in die Calvinistiese geloof en glo hulle besit 'n vrou, hulle besit 'n kind, hulle besit alles, en daarom kan hulle daardie lewe neem, want hulle besit dit," het sy gesê.
"Ons het ook kulturele verskille in ons eie gemeenskappe waar ons vroue het wat gedwing word om te trou en ons hanteer al daardie sake."
ABC het 'n onderhoud met Xingwana gevoer oor die dood van die Paralimpiese kampioen Oscar Pistorius se meisie, Reeva Steenkamp.
Die insetsel, wat Maandag uitgesaai is, fokus op vuurwapengeweld in Suid-Afrika.
"Ek sal hom vra om die waarheid te praat. Ek sal hom vra om vroue te respekteer," het Xingwana gesê.
"Ek sal hom vra om ontslae te raak van sy vuurwapens. Want ek glo as hy nie vuurwapens in sy huis gehad het nie, sou Reeva Steenkamp vandag gelewe het."
Bosman het gesê Xingwana se uitlatings is 'n "ekstreme verbale aanval op die integriteit van Afrikaners".
"Dit is ongeldig, ongevraagd en van alle waarheid ontbloot. Die minister skuld ten minste aan Afrikaners, mans, vroue en kinders, 'n onvoorwaardelike verskoning," het Bosman gesê.
Die Afrikanerbond het gesê hy sal die saak met die kantoor van pres. Jacob Zuma opneem, sodat die president kan "optree teen een van die mees onbevoegde ministers in sy kabinet," het Bosman bygevoeg.
Ook AfriForum het Dinsdag gesê hy oorweeg dit om 'n klagte teen Xingwana by die gelykheidshof te lê oor haar uitlatings.
– Volg Nuus24 op Twitter.
- SAPA
