Woede oor baba Wade-vonnis
2013-03-05 12:46
Pretoria – Die Child Abuse Action Group het sy woede uitgespreek oor die vonnis van baba Wade se ouers, Marissa Rudman en Nolan Schoeman.
Rudman en Schoeman is Dinsdag in die Pretoriase hooggeregshof tot onderskeidelik 10 en 13 jaar tronkstraf gevonnis vir die moord op hul twee maande oue babaseun.
"Tien en 13 jaar is maar 'n tikkie op die skouer, want waar is die kind? Hy is weg, en weg op die vreeslikste manier," het Lucy Redivo van die aksiegroep gesê.
"Hy het weke lank gely. Hy het wonde gehad wat gesond geword het en wat meer as twee weke oud was. Ons moet strenger vonnisse vra vir mense wat babas doodmaak. Regter Cynthia Pretorius was baie toegeeflik met hulle."
Die 36-jarige Rudman het op Schoeman gevloek en geskree terwyl sy geboei is ná die vonnis.
"I hope you f*****g die. You f*****g c**t. How could you not speak up? You took my baby from me," het Schoeman geskree en in trane uitgebars.
Pretorius het Dinsdag beslis dat die twee jaar wat Schoeman reeds in die tronk was, in ag geneem is toe sy vonnis bereken was.
Die regter het bevind daar was wesenlike en dwingende omstandighede wat 'n mindere vonnis regverdig, ten spyte van die afgryslike manier waarop die paartjie hul baba gemartel en vermoor het.
'n Patoloog het in die verhoor getuig dat sy nog nooit 'n kind met sulke erge beserings gesien het nie. Baba Wade se breinbeserings was so erg dat die swelling sy skedel gebreek het. Sy twee voorarms is ook gebreek, kneuswonde is aan sy gesig en lyf gevind en hy het 22 gebreekte ribbes gehad.
Pretorius het gesê Schoeman en Rudman is self erg as kinders mishandel en het ook dwelms gebruik.
Sy het die omstandighede waarin die paartjie hulle bevind het, soos ondermeer werkloosheid, en 'n gebrek aan geld en vervoer, ook in ag geneem.
Die regter het gesê die baba is minstens twee weke voor sy dood erg mishandel. Pretorius het gesê sy glo nie dat een van die twee berouvol is nie, hoewel hulle die grootheid van hul verlies besef.
Rudman het nog twee jaar ná hul in hegtenisneming saam met Schoeman gewoon en het eers hul verhouding verbreek nadat hy weer in hegtenis geneem is.
Pretorius het gesê dit is moeilik om te glo dat Rudman 'n mishandelde vrou was, omdat sy Schoeman dikwels weggejaag het, maar altyd teruggevat het.
– Volg Nuus24 op Twitter
- SAPA
