Wiskunde bly Grieks vir matrieks
2012-01-08 11:42
Johannesburg – Suid-Afrikaanse skoliere se wiskundeprobleme begin al veel vroeër as in matriek en indien die droewige wiskunde-matriekuitslae verbeter gaan word, moet die nodige ingrypings al in gr. R begin.
So sê dr. Vijay Reddy, uitvoerende direkteur van die Raad vir Geesteswetenskaplike Navorsing (RGN) se program vir onderwys, wiskunde en vaardigheidsontwikkeling.
Soos vorige jare is die wiskundepunte van die 2011-matriekgroep rede tot kommer: Slegs 46,3% het meer as 30% behaal.
Die herhaalde swak prestasie in wiskunde is in teenstelling met die algemene slaagsyfer, wat van 67,8% tot 70,2% gestyg het.
Suid-Afrikaanse en internasionale toetse het al keer op keer bewys die gemiddelde nasionale wiskundepunte in gr. 3, gr. 4, gr. 6 en gr. 8 lê tussen 30% en 40%.
Waar punte in ander vakke deur ingryping op ’n laat stadium verbeter kan word, werk dit nie met wiskunde nie, sê Reddy.
“Die verkryging van dié vaardighede word in die vroeë jare gevorm deur die aard en gehalte van interaksie in die kind se huis, gemeenskap en die gehalte van die skool.”
Internasionale toetse, soos dié van die Suider- en Oos-Afrika-konsortium vir die monitering van onderwysgehalte (Sacmeq) vroeër vanjaar, het gewys leerlinge in ander Afrika-lande het beter as Suid-Afrika se bestes gedoen.
Hoewel matrieks toenemend die vak wiskundige geletterdheid bo die hoër-standaard wiskunde verkies, sê Avron Herr van die Pace Career Centre dat 70% tot 80% van gr. 10’s en gr. 11’s steeds wiskunde neem.
Hulle weet dit word vir die meeste graadstudies – buiten BA, die kunste en algemene onderwys – vereis, maar wanneer hulle die vak druip, slaan hulle oor na wiskundige geletterdheid.
Die nasionale vereniging van skole vir tegnologie (Nast) baklei al jare lank vir meer funksionele wiskunde- en wetenskapvakke vir tegnologieskole.
Ferdie Liddle, voorsitter, sê ’n leerling wat ’n ambagsman wil word, het nie die huidige vorm van wiskunde nodig nie. Wiskundige geletterdheid berei hulle egter nie vir die bedryf voor nie.
Volg Nuus24 op Twitter
- Rapport
