Winnie nie verhewe bo die wet – DA

2012-11-08 15:50

Johannesburg – Aanklagte teen twee polisiemanne, wat twee jaar gelede in 'n onderonsie met Winnie Madikizela-Mandela en haar lyfwagte betrokke was, moet laat vaar word, het die DA Donderdag gesê.

"Madikizela-Mandela moet besef dat sy nie verhewe is bo die wet nie," het Kate Lorimer, DA-woordvoerder oor gemeenskapveiligheid, gesê.

Lorimer het gesê dit is "ondenkbaar" dat die mans vir 'n derde keer aangekla is.

Ao. Jannie Odendaal en konst. Abel Twala het Dinsdag op aanklagte van intimidasie en die rig van 'n vuurwapen in die hof verskyn. Twala is ook aangekla van aanranding.

Die nasionale vervolgingsgesag (NVG) het gesê  die korrekte prosedure is nie gevolg toe die aanklagte vir 'n tweede keer in Augustus teruggetrek is nie.

Die aanklagte is in September 2011 vir die eerste keer teruggetrek omdat die staatsaanklaer nie bereid was om hulle te vervolg nie.

"As daar nie genoeg bewyse was om Madikizela-Mandela en haar lyfwagte te vervolg nie, hoe kan daar genoeg bewyse wees om die polisiemanne aan te kla," het Lorimer gesê.

Odendaal en Twala sal later vandeesmaand weer in die hof verskyn.
      
– Volg Nuus24 op Twitter

- SAPA