Winnie kritiseer De Kock-kwytskelding
2010-01-25 08:37
Johannesburg - Die ANC-LP Winnie Madikizela-Mandela het die verwagte presidensiële kwytskelding van Eugene de Kock, voormalige bevelvoerder van die polisie se Vlakplaas-eenheid, fel gekritiseer.
Volgens The Star vergelyk Madikizela-Mandela die moontlike vrylating van De Kock met dié van Janusz Walus, wat vir die moord op Chris Hani skuldig bevind is.
"Dit maak sy seer om selfs daaroor te praat. As jy oor De Kock praat, praat jy oor Walus met my," het sy gesê.
"Ek kan nie glo dat ons al begin praat oor de Kock se vroeë vrylating nie. Ek kan nie."
Gerugte doen die ronde dat De Kock presidensiële kwytskelding gaan kry ná hy verlede jaar glo met pres. Jacob Zuma vergader het.
Naweekkoerante berig dat hy binnekort vrygelaat word.
"Wat van die slagoffers? Ek ken sommige van die kinders wat doodgemaak is, se ma's. Hulle is nie gevra of hy vrygelaat moet word nie."
"De Kock se vrylating is 'n onderwerp wat ek nie eers kan oorweeg nie. Ek het te veel verloor. Ek het te veel bloed gesien om dié besluit te ondersteun. Hy verdien om te wees waar hy is," het sy gesê.
– Sapa