Wimpy-bestuurder van Bfn verdwyn spoorloos
2011-10-10 07:27
Bloemfontein – Die bestuurder van ’n eetplek in Bloemfontein het Vrydagaand spoorloos verdwyn.
Béola Williamson (30) is siek van bekommernis ná die verdwyning van haar man, Steven (30).
Hy is die bestuurder van die Wimpy op Prellerplein.
Mnr. Williamson het Vrydagaand verdwyn nadat hy Marinell O’Neil van die Hair Art-haarsalon omstreeks 23:00 by haar huis in Uitsig afgelaai het. Hulle was vroeër op ’n gholfdag ten bate van borskankerlyers by die Tempe-weermagbasis.
Mev. Williamson het haar man daarna gebel om vir haar ’n asmapompie saam te bring huis toe. Dit was die laaste keer wat sy met hom gepraat het.
Die hoop het Sondag opgevlam nadat iemand laat weet het hy het mnr. Williamson Saterdag omstreeks 08:00 by die Engen-garage by die Kroonvaal-tolhek sien brandstof ingooi.
Hy was glo alleen in sy wit Toyota Yaris (registrasie nommer DRF011FS).
“Niks maak sin nie. Steven sal nie sommer verdwyn nie. Hy het nog altyd huis toe gekom. Ek weet nie wat om te dink of te voel nie,” het mev. Williamson snikkend vertel.
Daar is ’n klomp vrae rondom sy verdwyning. Nadat hy O’Neil afgelaai het, was hy glo by die werk en die opnames vir die kringtelevisiekamera’s vir daardie tydperk is uitgewis. Geld is uit die kluis weg sonder dat daar ingebreek is. Sy selfoon is die volgende oggend onder die toonbank gevind.
“Hy het nie die geld gevat nie. Dit kan ek jou nou sê. Hy is nie so ’n mens nie. Ons het nou net ’n nuwe lewe begin. Hy sou volgende maand ’n nuwe werk begin en ons het ’n vakansie beplan, so hoekom sal hy nou verdwyn?
“Hy moes gedwing gewees het om te doen wat hy gedoen het. Hoekom sal hy sy selfoon by die kantoor gelos? Ek wil nie hoop verloor nie. Ek soek my man terug. Hy is my lewe,” het sy Sondag gesê.
Mev. Williamson sê haar hoop is op Leon Rossouw, ’n private speurder, om haar man op te spoor.
Rossouw sê hy volg verskeie leidrade op.
Mnr. Williamson se verdwyning volg op dié van Isak “Sakkie” Jacobus Nienaber (52), wie se lyk Vrydag in sy motor se bagasiebak gevind is. Hy was vier dae lank vermis voordat hy gekry is.
Enigiemand met inligting oor Williamson se verdwyning, of wat sy motor gewaar, kan Rossouw by 083-410-0900 bel, of ’n e-pos stuur aan info@detectives.co.za
Volg Nuus24 op Twitter
- Volksblad