Willie Hofmeyr soek Zuma-opnames
2012-01-19 14:01
Johannesburg – Willie Hofmeyr, voormalige hoof van die spesiale ondersoekeenheid (SOE), wil ‘n kopie hê van die 2007-opnames wat daartoe gelei het dat die aanklagte van korrupsie teen pres. Jacob Zuma laat vaar is.
The Times het berig dat Hofmeyr dié versoek aan die kantoor vir onderskeppingsentrums gerig het.
Hofmeyr vra in ‘n vertroulike brief aan Brian Koopedi, direkteur van die sentrum, vir bevestiging dat die sentrum steeds die opnames van die telefoongesprekke het. Die brief is 2 November gedateer.
Die opnames bevat glo geheime gesprekke tussen Hofmeyr se afgedankte voormalige adjunk, Faiek Davids, en Leonard McCarthy, voormalige hoof van die Skerpioene.
In die brief vra Hofmeyr hoe die SOE ‘n kopie van die opname kan bekom.
Hofmeyr het Davids in November 2010 afgedank weens ‘n tekort aan vertroue.
Sy brief kom ná ‘n bevinding deur Bart Ford, bevelvoerder van die Kommissie vir Versoening, Bemiddeling en Arbitrasie (KVBA), op 27 September 2011.
Ford het bevind dat die verkryging van die Zuma-opnames en telefoon-onderskeppings van die gesprek tussen Davids en McCarthy die Wet op die Reëling van die Onderskepping van Kommunikasie oortree het.
Die KVBA-saak het bygedra tot Davids se afdanking.
Hofmeyr het ‘n aansoek by die Johannesburgse arbeidshof ingedien om Ford se bevinding te hersien.
Volg Nuus24 op Twitter
- SAPA
