William Nicol-jaagtog: SAPD op bende se spoor

2012-08-29 11:48

Fourways – Polisiebeamptes bestudeer bewyse op die toneel van ‘n ongeluk nadat ‘n dramatiese skietery en jaagtog in Fourways, noord van Johannesburg, plaasgevind het.

Eyewitness News berig een verdagte is vroeër vasgetrek, terwyl drie ander steeds op vrye voet is. Sapa het vroeër berig dat twee mans steeds soek is.

EWN het intussen berig die polisie het drie vuurwapens in die wegkommotor, wat in ‘n ongeluk betrokke was, gevind.

Ondersoekers het die blou BWM vir vingerafdrukke afgestof, terwyl hul kollegas ander bewyse op die toneel nagegaan het.

Die nuusbron verneem die jaagtog het vroeg Woensdagoggend by Fourways Mall ontstaan nadat die bende na bewering by die iStore ingebreek het.

Die rowers het op die vlug geslaan, maar die polisie het hulle agternagesit, waarna ‘n skietery uitgebreek het. Daarna het die verdagtes teen ‘n minibustaxi gebots.

Kol. Katlego Mogale, ‘n polisiewoordvoerder, sê die verdagtes het toe verder te voet gevlug.

Volg Nuus24 op Twitter