Wetenskaplike se moordenaar skuldig bevind
2012-05-17 21:01
Pretoria – ‘n Man van Dennilton wat deel was van die bende wat ‘n afgetrede wetenskaplike vyf jaar gelede in sy huis in Garsfontein vermoor het, is Donderdag skuldig bevind.
Die Hooggeregshof in Pretoria het bevind dat Abel Magopa (38) die 61-jarige Professor Bill van der Riet vermoor het en ‘n tas met klere, munte en ‘n DVD-speler gesteel het.
‘n Lid van die Gemeenskapspolisiëringsforum het Van der Riet se lyk gevind nadat sy tuinier alarm gemaak het toe hy nie toegang tot die eiendom kon kry nie.
Regter Cynthia Pretorius het die manier waarop die afgetrede mikrobioloog gevind is as “hartseer” beskryf.
“Ek dink nie enigeen van ons wil in daardie posisie gevind word nie,” het sy gesê.
Van der Riet is gevind waar hy halfkaal en vasgebind was, met ‘n vadoek wat om sy nek gebind was.
Magopa se vingerafdruk is op ‘n koerantadvertensie en sy palmafdruk op ‘n pamflet langs die lyk in die huis gevind.
Die tas is buite in ‘n blombedding naby die hek gevind.
Magopa het erken dat sy vingerafdrukke op die toneel gevind is, maar het enige betrokkenheid by die moord ontken.
Hy het verduidelik dat hy ‘n motorwag by die Willows Sentrum was en dat sommige gereelde kliënte hom genoeg vertrou het om hom toe te laat om hul koerante te lees terwyl hulle in die sentrum inkopies gedoen het.
Pretorius het gesê Magopa se getuienis is onwaarskynlik en sy glo nie sy storie oor hoe sy vingerafdrukke op die toneel gekom het nie.
Hy het aan ‘n polisiebeampte gesê hy het by ‘n kroeg gewerk, maar hy het aan die hof gesê hy het as ‘n motorwag gewerk.
Sy het gesê Van der Riet is verneder en op ‘n verskriklike manier vermoor.
Daar is ‘n moontlikheid dat ander mense ook betrokke was.
Salome Scheepers, aanklaer, het gevra vir ‘n vonnis van lewenslange tronkstraf.
Sy het gesê dit is baie verswarend dat Van der Riet ‘n bejaarde persoon was wat in sy eie huis aangeval is.
“Ons woon in tronke net om onsself te beskerm. Dit behoort nie so te wees nie,” het sy gesê.
Die verdediging het gesê die moord was nie voorafbeplan nie, aangesien die rowers ‘n vuurwapen kon saamvat indien hulle hul slagoffer wou doodmaak.
Vonnisoplegging sal op 22 Mei geskied.
- Volg Nuus24 op Twitter
- SAPA
