Wet sluit dié wittes dalk uit
2012-02-08 09:01
Pretoria – As die voorgestelde wysigings aan die Wet op Breë-basis- Swart Ekonomiese Bemagtiging (BBSEB-wet) deurgaan, sal dit op “gruwelike ongrondwetlike diskriminasie” neerkom.
Dié wysigings sal tot die algehele uitsluiting van wit gestremdes uit die Wet op Gelyke Indiensneming se definisie van aangewese groepe lei.
Die vakbond Solidariteit het teen die wysigings uitgevaar en gesê dit is ondenkbaar hoe teen gestremdes op grond van hul ras gediskrimineer kan word.
Diskriminasie teen gestremdes ken geen kleur nie, het dr. Dirk Hermann, uitvoerende adjunk-hoof van Solidariteit, gesê.
Kommentaar op die voorgestelde wysigings het Dinsdag gesluit. Solidariteit het in sy voorlegging aan Rob Davies, minister van handel en nywerheid, gevra dat wittes met gestremdhede ingesluit moet word in alle vorme van bemagtiging wat ten doel het om onbillike diskriminasie te pak.
Wit gestremdes is op die oomblik deel van die definisie van die aangewese groep in die Wet op die Gelyke Indiensneming wat regstellende aksie reguleer, maar is nie meer deel van die definisie van die aangewese groep in die BBSEB-wet nie.
Ingevolge die nuwe wysigings dra die BBSEB-wet meer gewig en sal dít geld as daar enige spanning tussen die twee wette se definisies van die aangewese groep ontstaan.
In praktyk beteken dit dat as ’n maatskappy ’n werklose wit gestremde aanstel, sal die maatskappy nie punte vir sy swartbemagtigingstelkaart kry nie. As hy ’n nie-gestremde welvarende swart persoon in diens neem, sal dit ingevolge die BBSEB-wet punte vir die aanstelling verdien.
As die wit gestremde die maatskappy ingevolge die Wet op Gelyke Indiensneming hof toe sleep, sal die BBSEB-wet se definisie van die aangewese groepe, wat wit gestremdes uitsluit, geld.
Volgens Hermann is gestremdes deel van die benadeelde groepe op grond van hul gestremdheid en nie ras nie. “Die paradoks is nou dat wittes met gestremdhede uit die definisie van aangewese groepe gehaal word op grond van hul ras en nie gestremdheid nie.
“Swart gestremdes bly egter deel van die bevoordeelde groep en daar word spesiale voorsiening vir hulle gemaak op grond van hul gestremdheid.”
Hy het gesê die uitsluiting van wit gestremdes uit bemagtiging maak van Suid-Afrika se bemagtigingsproses ’n suiwer rasseproses en nie ’n bona fide teen die diskriminasieproses nie.
Verskeie gestremdes wat die nuuskonferensie bygewoon het, het hul misnoeë met die wysigings uitgespreek en gesê dit is vir hulle ’n verdere struikelblok, want in die werkplek word reeds teen hulle gediskrimineer.
Volg Nuus24 op Twitter
- Volksblad