Wet oor onteiening kan verander
2010-09-24 07:00
Die Burger
Durban - ’n Aanpassing aan die Onteieningswet gaan die voertuig wees waarmee die ANC beplan om weg te doen met die beginsel van gewillige verkoper, gewillige koper.
Lindiwe Sisulu, voorsitter van die ANC se subkomitee oor maatskaplike transformasie, het Donderdagaand hier gesê afgevaardigdes by die party se hoofraadsvergadering (NGC) was driftig oor die stadige pas van grondhervorming en dring daarop aan dat by die teiken van 30% landbougrond in swart hande teen 2014 gehou word.
“Gegewe die hoë vlakke van armoede in die land het afgevaardigdes antwoorde geëis oor waarom grondhervorming, wat gesien word as ’n manier om welvaart te skep, so stadig vorder. Is dit struktureel of is dit die beginsel van gewillige koper, gewillig verkoper?” het sy op ’n inligtingsessie gesê.
Sy was nie bereid om verdere besonderhede te verstrek nie, maar het gesê die fynere bepalings van die wysigingswet sal afgehandel word ná ’n werksessie by Luthuli-huis op 9 Oktober.
“Dié werksessie is veronderstel om die laaste skaafwerk aan die departement van landelike ontwikkeling en grondhervorming se groenskrif oor grondhervorming te doen. Ons kort nog ’n bietjie inkoop daarin van alle rolspelers in die party.”
Dié twee ingrypings word beskou as die doeltreffendste manier om grondhervorming, wat die regering erken vasgeval het, aan die gang te kry. “Adj.pres. Kgalema Motlanthe het belangstelling getoon oor veral die fynere besonderhede.”
Dié besluite strook met die party se Polokwane-resolusies, wat beslis daar moet weggedoen word met die beginsel van gewillige verkoper.
Johannes Möller, president van Agri SA, was nie vir kommentaar bereikbaar nie, maar het vroeër aan Die Burger gesê hy is ná insiggewende gesprekke op die kantlyn van die NGC met ministers positief oor wat die landboubedryf te doen staan.
Afgevaardigdes by die NGC dring voorts daarop aan dat mense met die vereiste vaardighede en kundigheid by munisipaliteite aangestel moet word om dienslewering te verbeter.
Bathabile Dlamini, adjunkminister van maatskaplike ontwikkeling, het op dieselfde inligtingsessie gesê daar is ’n verband tussen die optogte oor swak dienslewering en die reuse-vaardigheidstekort waardeur die land in die gesig gestaar word.
- Die Burger