Weskussers jive vir Jesus, laat Buchan met sweep tuis voel
2009-10-18 12:57
“Die Djirre wat ons stuur, Hy is soe wonderbaar!”
Meer as 7000 Weskussers het gister Vredendal se skouterrein laat bewe terwyl hulle “vir Jesus” in ’n tipiese Weskus-aksent gesing en gejive het.
Wit, bruin en swart, wynboere, vissers en plaaswerkers, Afrikaans en Engels het hul “ander godsdiens”, rugby – en die groot Curriebeker-halfeindstryd tussen WP en die Blou Bulle – vergeet om “ons geloof op te trek,” het ’n organiseerder gesê toe hy die lekeprediker Angus Buchan welkom geheet het.
Die boodskap was duidelik: “Ons kry net een kans om na Angus Buchan te luister; ons kan die halfeindstryd later weer kyk.”
In die skare was daar egter darem ’n klomp WP-truie en hier en daar ’n Blou Bul-trui.
Buchan – die “plaasboer en wit Zoeloe”, soos hy in Afrikaans na homself verwys het, het sy gehoor om die beurt in Engels, Afrikaans en Zoeloe toegespreek.
“My son is married to a beautiful Afrikaanse meisie. And my granddaughters are teaching me this heavenly language. Hulle sê altyd: Oupa, as ons eendag in die hemel kom, praat ons Afrikaans!”
Voordat Buchan met sy “boodskap van hoop” begin het, het die Weskussers hom ’n sweep as geskenk gegee om “ons pa van die nasie tuis te laat voel tussen ons”.
Buchan het deurgaans saamgesing toe die gehoor met Afrikaanse gospelliedjies losgetrek het.
In sy boodskap het hy weer verwys na sy hartprobleem van vroeër vanjaar en vertel dat ’n “Moslem-dokter” aan hom gesê het: “Mnr. Buchan, daar is nou niks met jou hart verkeerd nie.”
Aan Rapport het Buchan voor die byeenkoms vertel dat aanstaande jaar se Mighty Men-konferensie sy laaste is.
“Maar Suid-Afrika is ’n land van hoop. Ek is hier om te bly. Hier is nog baie werk.”
- Rapport
Vir meer hieroor, besoek Rapport