Wes-Kaapse leerders beter met syfers
2013-01-14 14:59
Kaapstad – Onafhanklike toetse het getoon dat die wiskundevaardigheid en geletterdheid van Wes-Kaapse leerders in Graad 3, 6 en 9 verbeter het, het die provinsiale departement van onderwys Maandag gesê.
Meer as 250 000 leerders is verlede jaar in Oktober vir hulle begrip van sleutelkonsepte getoets, het Donald Grant, LUR, gesê.
Die uitslae is vergelyk met uitslae van 2011, wat gebaseer is op 'n slaagvereiste van 50%.
Die grootste verbetering was in taalvaardighede by Graad 3-leerders, waar die slaagsyfer van 30,4% in 2011 verbeter het tot 38,9% in 2012.
Taalvaardighede van leerders in Graad 6 het ook verbeter, met die slaagsyfer wat van 31,5% tot 36,9% gestyg het, terwyl die slaagsyfer vir Graad 9-leerders verbeter het van 44,2% tot 48,2%.
Die wiskunde-slaagsyfer vir Graad 3-leerders het van 46,6% tot 51,5% verbeter. Graad 6-leerders het 'n slaagsyfer van 26,4% vir 2012 behaal, ná die syfer in 2011 23,4% was.
Altesaam 13,9% van Graad 9-leerders het die wiskundetoets geslaag, ná dit in 2011 op 10,9% gestaan het.
Grant het gesê die uitslae dui op 'n verbetering, maar dat baie werk nog nodig is.
"Ons was in 2009 daarvan bewus dat ons strategie om geletterdheid en syfervaardigheid te verbeter, tyd sal neem. Ons het inderwaarheid gesê dit sal 10 jaar neem voor ons tevrede is met die vlak van resultate in hierdie areas."
– Volg Nuus24 op Twitter.
- SAPA
