Wes-Kaap verdeeld oor Mangaung-benoeming

2012-11-30 18:05

Kaapstad – Wes-Kaapse ANC-takke was Donderdag nog diep verdeeld oor wie as die regerende party se leier benoem moet word vir die Mangaung-verkiesingskongres in Desember.

Die benoemingsproses, wat tydens 'n byeenkoms van die provinsiale algemene raad in Kaapstad moes begin, is vertraag terwyl lede van die provinsie se uitvoerende komitee agter geslote deure vergader het om taklyste na te gaan.

Die Wes-Kaap het 170 ANC-takke.

Slegs 150 van die takke kon egter die vergadering van die provinsiale algemene raad bywoon. Die ander takke het nie die vereiste takvergaderings gehou om hulle kandidaat te benoem nie.

Altesaam 122 afgevaardigdes is reeds geverifieer.

Die res van die name moet eers op taklyste afgemerk word om te verseker dat afgevaardigdes se lidmaatskap geldig is, en dat hulle as verteenwoordigers van hulle onderskeie takke mag optree.

Terwyl afgevaardigdes die saal verlaat het waar die benoeming gedoen sal word, het een groep pro-Zuma-liedere gesing, terwyl die ander gedreunsing het dat hy die tuig moet neerlê.

Afgevaardigdes is ook aangesê om T-hemde uit te trek met gesigte van kandidate op.

– Volg Nuus24 op Twitter.

- SAPA