Wes-Kaap nié gereed vir Aarto, sê Carlisle
2012-01-21 09:35
Kaapstad – Die omstrede Aarto-verkeerswet sal nie op 1 April in die Wes-Kaap in werking tree nie, tensy die Padverkeersbestuurskorporasie (RTMC) en die Padverkeersoortredingsagentskap (RTIA) die vermoë het om dit te bedryf.
Só het die Wes-Kaapse minister van vervoer en openbare werke, Robin Carlisle, Vrydag gesê.
Die RTMC het Woensdag aangekondig die Wet op die Administratiewe Beregting van Verkeersmisdrywe (Aarto) sal op 1 April in werking tree.
Die Burger het Donderdag berig Collins Letsoalo, waarnemende uitvoerende hoof van die RTMC, het volgehou die owerhede is slaggereed en die enigste uitstaande element is of die publiek vir dié wet gereed is.
Letsoalo het nie aangedui of Aarto met of sonder die gevreesde strafpuntstelsel, wat bestuurders hul rybewyse kan kos, in werking gestel gaan word nie.
Die RTMC is oorhoofs verantwoordelik vir Aarto, met die RTIA wat vir die boetestelsel verantwoordelik is.
Daar is vrese dat dié instansies nie gereed is om die wet toe te pas nie. Carlisle het sy bekommernis in briewe aan die twee liggame oorgedra en teenstrydige antwoorde gekry, wat sy kommer laat verdiep het.
Hy is besorg oor die wettigheid van Letsoalo se besluite, aangesien die arbeidshof verlede jaar sy aanstelling onwettig verklaar het. Letsoalo gaan egter hierteen appelleer.
“Enige optrede van hom kan moontlik onwettig wees,” het Carlisle gesê.
Voorts het Carlisle ná ’n kritiese verslag van die ouditeur-generaal bedenkinge oor die RTMC se finansiële sake .
“Dit is nie Alice in Wonderland nie. Wat is aan die gang?” wou Carlisle weet.
Carlisle het gesê sy departement, die Wes-Kaapse departement van gemeenskapsveiligheid en die munispaliteite – veral dié van Kaapstad – versamel tans alle moontlike inligting en beraadslaag oor ’n plan van aksie.
“Die situasie is eenvoudig: Aarto word nie op 1 April in die Wes-Kaap in werking gestel nie. Ons sal dit doen wanneer die RTMC en RTIA dit kán bedryf.
“Ons sal ons na die howe wend om ons burgers te beskerm,” het Carlisle gesê.
- Die Burger