Wes-Kaap het die meeste skoolverlaters
2011-07-14 09:07
Kaapstad - Die Wes-Kaap het die hoogste uitvalkoers van skoolkinders in die land, het Angie Motshekga, minister van basiese onderwys, Woensdag gesê.
“Daar is tans 500 000 kinders landwyd wat nie in die skolestelsel is nie, van wie die meerderheid in die Wes-Kaap is,” het sy aangevoer.
Bronagh Casey, woordvoerder van die Wes-Kaapse onderwysdepartement (WKOD), het in reaksie daarop gesê dit is moeilik om op Motshekga se uitlatings te reageer aangesien die WKOD nie weet waarop sy haar inligting grond nie.
“Ons kan egter wel sê dat die aantal kinders wat in die skool bly in die laaste twee jaar toegeneem het.”
Volgens haar kan ’n mens ook nie sê al die leerders wat skool verlaat, val uit nie. “Baie van hulle skryf in by kolleges vir verdere onderwys en opleiding (VOO-kolleges), of ondergaan ander opleiding.”
Motshekga het egter aangevoer dat maatskaplike probleme soos fetale alkoholsindroom, kinders wat by bendes aansluit en die afhanklikheid van dwelms van die redes is waarom die uitvalkoers van leerders so hoog is in die Wes-Kaap.
Sy was Woensdag deel van ’n afvaardiging bestaande uit die regering, sakelui, vakbonde en nieregeringsorganisasies wat ’n samewerkingsooreenkoms onderteken het om die gehalte van onderrig in skole te verbeter.
Ingevolge die inisiatief gaan die departement van onderwys tesame met belanghebbendes die mees wanfunksionele skole in die land “aanneem”.
Die Neem ’n Skool Aan-veldtog, soos dié inisiatief bekend staan, behels dat die departement se “maatskaplike vennote” (die burgerlike samelewing, vakbonde, ouers en die sakesektor) vanjaar by 100 tot 200 swak presterende skole ingryp en geldelike en ander hulpbronne beskikbaar stel.
Volgens Motshekga sal haar departement in samewerking met provinsies ’n lys van wanfunksionele skole saamstel en beskikbaar stel.
– Volg Nuus24 op Twitter
- Die Burger