Werkers van SAA en Prasa staak
2013-01-18 12:43
Johannesburg – Lede van die Suid-Afrikaanse Lugdiens wat aan die National Transport Movement (NTM) behoort, sowel as lede van die Passasierspooragentskap van Suid-Afrika (Prasa), het Vrydag met ‘n staking begin, het beamptes gesê.
Liver Mngomezulu, die adjunk-sekretaris-generaal van NTM, sê beide SAA en Prasa weier om die vakbond te erken.
Hy sê sowat 220 werkers van SAA het teen 08:00 by die lugredery se hoofkwartiere in Johannesburg saamgekom.
“Ons verwag dat al 1 300 van ons lede aan die betoging gaan deelneem... Ons het slegs klein vertragings gehad as gevolg van die reën, maar ons behoort almal teen 10:00 hier te wees,” het hy gesê.
“Lede van ander vakbonde het ook gesê hulle sal by ons aansluit.”
SAA het Maandag gesê hy is voorbereid vir die staking en het gebeurlikheidsplanne in plek gestel om minimale ontwrigting te verseker.
Tlali Tlali, woordvoerder vir SAA, het in ‘n verklaring gesê geen vlugte van SAA is weens die staking gekanselleer of vertraag nie.
Die lugredery het sowat 11 000 werknemers.
Mngomezulu het nietemin gesê hy is seker dat die staking ontwrigting van vlugte sal veroorsaak.
“Verlede keer het ons ‘n twee uur lange staking gehad en verskeie vlugte is vertraag en gekanselleer, so ons verwag nog meer vandag, aangesien ons die hele dag daar gaan wees totdat SAA se bestuur besluit om ons te erken,” het hy gesê.
Die NTM beweer die bestuur van SAA weier om hom te erken as ‘n verteenwoordiger van die werkers, selfs al het hy die aantal kandidate oorskry wat nodig is om as verteenwoordiger bekragtig te word.
Tlali Tlali het dié bewerings Donderdag in ‘n verklaring van die hand gewys.
“NTM maak staat op ‘n bewering dat sy lidmaatskap meer as 1 300 is. Sy lede sluit werknemers in uit kategorieë waarvoor daar nie in die grondwet van die onderhandelingsforum voorsiening gemaak word nie."
NTM sê hy het ‘n lidmaatskap van 4 000 by Prasa.
– Volg Nuus24 op Twitter
- SAPA
