Werkers keer plaasaanval
2010-07-05 08:24
Beeld
Twee werkers van ’n bejaarde melkboer van Schweizer-Reneke in Noordwes het ’n plaasaanval in die wiele gery toe hulle die boewe in sy plaashuis ingewag en een in die been geskiet het.
’n Polisieman (36) van die Amalia-polisiekantoor wat na bewering die vermeende boewe se wegkommotor bestuur het en ’n ander verdagte (20) verskyn vandag in die Schweizer-Reneke-landdroshof op aanklagte van onwettige oortreding van ’n perseel met die doel om ’n misdaad te pleeg.
Dié voorval, wat volgens Agri SA die eerste plaasaanval sedert die begin van WB 2010 is, kom skaars twee maande nadat ’n polisievrou van Roodepoort en ’n oud-polisieman van Randfontein weens ’n gewapende plaasaanval in Schweizer-Reneke aangekeer is.
Hendrik (Tokolosh) Eksteen (44), voorman op die plaas van Toby van den Heever (80), ’n invalide, tussen Schweizer-Reneke en Delareyville naby Migdol, het Sondag vertel hoe hy “vinnig moes reageer” toe vier gewapende mans Saterdag 02:00 die kombuisdeur se veiligheidshek oopbreek.
Hy en Abraham Sesing (44), ’n werker wat saam met Eksteen en dié se vrou, Susan (47), en hul tienjarige seuntjie, Waldi, saam met Van den Heever in sy plaashuis bly, het die boewe ingewag.
Sesing het Van den Heever kort voor die voorval na die toilet en terug na sy bed geneem, waar hy gewag het totdat Van den Heever aan die slaap raak.
“Toe Abraham weer in sy eie bed klim, het hy die honde hoor blaf en geluide by die kombuisdeur gehoor en my kom wakker maak,” het Eksteen vertel.
Hy het sy pistool gegryp en saam met Sesing die vermeende rowers by die deur ingewag.
“Ons het hulle dopgehou en toe hulle die deur oopbreek, het ek een in die been geskiet,” het Eksteen gesê.
“Sy makkers het weggehardloop. Ons het die gewonde toe in die huis ingedra en beveel om op sy maag te lê met sy arms agter sy rug terwyl ek die polisie gebel het.
“Mens kan daardie vrees nie beskryf nie. Alle eer aan ons Skepper wat ons beskerm het.”
Die gewonde verdagte is onder polisiebewaking in die hospitaal opgeneem, maar is reg om vandag (Maandag) in die hof te verskyn.
Volgens Mildred Veldman (29), Van den Heever se kleindogter, bly Sesing en die Eksteens die laaste paar maande by hom in die huis “juis om hom te help en te beskerm”.
“My oupa het sowat ses maande gelede sy een been verloor en moet dus ’n rystoel gebruik,” het sy gesê.
“Abraham en Tokolosh is helde. Ek kan my net indink wat kon gebeur as hulle dit nie stopgesit het nie.”
Die polisieman, wat glo van diens af was, is in ’n wit Toyota Avanza-motor naby die plaas gearresteer.
Dít nadat die polisie inligting ontvang het dat ’n wit motor glo in die voorval gebruik is.
Kapt. Aafje Botma, Noordwes-polisiewoordvoerder, het gesê daar is beslag gelê op die polisieman se dienspistool.
“Interne stappe sal teen hom gedoen word. Die ander drie verdagtes is nog soek.”
Volgens André Botha, voorsitter van Agri SA se nasionale veiligheidskomitee, is hy nie bewus van enige ander plaasaanval sedert die begin van WB 2010 nie.
“Tydens die WB weerhou politici hulle van opruiende uitsprake teen die boere.
Hoewel die verbintenis tussen uitsprake soos Kill the Boer, Kill the farmer en plaasaanvalle nie bewys kan word nie, is dit opvallend dat daar voor die WB byna twee aanvalle per dag plaasgevind het en tydens die WB bykans niks.”
- Volg Nuus24 op Twitter.