Werker vas ná aanval op boer

2012-12-28 11:45

Bethlehem – Drie mense, insluitend 'n vrou, is in hegtenis geneem nadat 'n boer vroeër vandeesmaand op sy plaas, Anogora in die Arlington-distrik beroof en aangerand is, berig OFM.

Majang Skalkie, polisiewoordvoerder in die Vrystaat, het in 'n verklaring gesê die vrou is 'n werknemer van die 73-jarige slagoffer, Jacobus Petrus Botha. Sy is Donderdag op die plaas in hegtenis geneem.

Die twee ander verdagtes is in Bohlokong in Bethlehem aangekeer.

Botha het na bewering op 7 Desember in sy kamer geslaap toe vier onbekende mans hom met 'n knopkerrie begin slaan het. Hulle het geld en vuurwapens geëis en Botha se hande en voete vasgebind.

Hulle het die huis geplunder en kos sowel as 'n DVD-speler gesteel.

Die vier het te voet gevlug en die beseerde Botha in die huis gelos. Hy is omstreeks 07:00 die volgende oggend gevind deur van sy plaaswerkers wat vir werk aangemeld het.

Skalkie sê die drie sal binnekort in the Lindley-landdroshof verskyn.

– Volg Nuus24 op Twitter