Werker fnuik aanval op plaas
2011-10-12 07:06
Fouriesburg – ’n Plaasvoorman, wat geweier het om die huissleutels van sy slapende werkgewer aan plaasaanvallers te gee, is deur die aanvallers in die hand geskiet en sy vrou in die been.
Samuel Chaba (39), voorman op die plaas Grootverwulf van Marianne Conlyn, ’n bekende in Suid-Afrikaanse perdekringe, lê in ’n hospitaal op Bethlehem.
Sy vrou, Maria (37), is ná behandeling vir ’n skietwond in die kuit uit die hospitaal ontslaan.
Mnr. Chaba is ’n held, het Conlyn Dinsdag gesê ná dié middernagtelike plaasaanval waarin die aanvallers uiteindelik gevlug het.
Die Chaba-egpaar is Maandag kort voor middernag deur vier aanvallers met klapmusse in hul huis op die plaas oorval.
Mnr. Chaba het wakker geword toe die aanvallers die voordeur oopbreek.
Toe hy weier om die sleutel van die hoofhuis, waar Conlyn geslaap het, asook selfone aan die rowers te gee, is hy in die regterhand geskiet, sê Conlyn.
Sy vrou het uit die kamer gekom en is summier in haar linkerkuit geskiet.
Mnr. Chaba is vasgebind en deur die aanvallers na die hek van die hoofhuis gebring en gedwing om dit oop te maak. Hier het hy van die aanvallers ontvlug, weggekruip en vir Conlyn gebel.
Toe sy ligte in die hoofhuis aanskakel en haar honde begin blaf, het die aanvallers gevlug.
Sy het ’n vriend gebel, wat bure en die polisie ontbied het.
“Ek het nog nooit sulke omgee beleef het nie.
“Omtrent al die boere van die plase hier naby het gekom om te help en sommiges het selfs in die berge na die aanvallers gaan soek. Ek dink hulle is oor die Lesotho-grens.”
Sy vermoed die aanvallers het vooraf die huis dopgehou.
Sers. Mmako Mophiring, polisiewoordvoerder, sê klagte van poging tot moord word ondersoek.
Enigiemand met inligting oor die aanval of aanvallers word gevra om die polisie op Fouriesburg by 058-223-0260 te bel.
Conlyn is ’n bekende in die perdekringe.
Sy was 18 jaar lank nou betrokke by die Suid-Afrikaanse Lipizzaners in Kyalami en bied steeds klasse vir ruiters aan.
Sy het die plaas in 2005 gekoop.
Volg Nuus24 op Twitter
- Volksblad