Werk aan Zuma se ampshuis gelos
2011-10-22 07:16
Kaapstad – Planne om byna R170 miljoen te bestee aan opknappingswerk aan Mahlambandlopfu, die Pretoriase presidentshuis, is gestaak.
Gwen Mahlangu-Nkabinde, minister van openbare werke, het die opknappingswerk in Maart gekanselleer omdat dit glo tien keer meer is as wat dit veronderstel is om te kos.
Mahlangu-Nkabinde en Mandla Mabuza, waarnemende direkteur-generaal (DG), slaan die afgelope twee dae verwoed vure dood nadat die “verkeerde antwoord” op ’n geskrewe parlementêre vraag van die DA die wêreld ingestuur is.
Dit is nie duidelik hoe die departement die fout begaan het nie aangesien dit algemene gebruik is dat die DG skriftelike antwoorde op parlementêre vrae afteken voordat dit aan die politieke partye verskaf word.
“Daar is nog nie met opknappingswerk begin nie. Nie ’n sent van belastingbetalers se geld is nog bestee nie,” het Mahlangu-Nkabinde in ’n verklaring gesê. Volgens haar is nóg die boukontrakte nóg die aanvangsdatum vir die opknappingswerk gefinaliseer.
“Ek wil Suid-Afrikaners verseker dit (die uitgawes) sal ooreenstem met normale boukoste.”
Mabuza het mediaberigte oor die voorgenome uitgawes as “absurd en belaglik” afgemaak. “Dit is snert.”
Jimmy Manyi, regeringswoordvoerder, het die voorgenome opknappingswerk aan Mahlambandlopfu egter verdedig. “Dit sal die president – die huidige en toekomstiges – in staat stel om hul veeleisende werkprogram te volg in ’n omgewing wat doeltreffend, veilig en relatief gerieflik is.”
Volgens Manyi is bogenoemde vereistes “betaamlik” vir die staatshoof. Dit kan nie as spesiale luukshede vir pres. Jacob Zuma bestempel word nie omdat sy opvolgers dit ook sal benut. Bespiegelings dat Zuma spesiale behandeling kry “ondermyn die waardigheid en werketiek van sy administrasie”, het hy gesê.
Ook die ANC is ongelukkig omdat Zuma gekasty word oor die voorgenome opknappings. “Die media kriminaliseer die instandhouding van openbare bates. Dit is hartseer dat ’n sekere gedeelte van ons samelewing net op die uitgawes fokus sonder om in ag te neem waarvoor die bates gebruik word,” het mnr. Jackson Mthembu, woordvoerder, in ’n verklaring gesê.
’n Ingeligte het aan Beeld gesê die geraamde onkoste vir die opknappingswerk aan Mahlambandlopfu én die Bryntirion-landgoed (R193 miljoen) “is tien keer meer as wat dit moet wees”.
Hoewel die werk aan die landgoed beplan word, is die syfers wat die departement eergister bekend gemaak het, ook foutief het ’n woordvoerder gesê.
Athol Trollip, die DA se parlementêre leier, het gister in ’n verklaring aangevoer daar is ’n slang in die gras. “Die minister sê die opknappings (aan Mahlambandlopfu) is te duur en gestaak, maar Manyi meen dit is geregverdig. Wie moet Suid-Afrikaners glo?”
– Volg Nuus24 op Twitter.
- Beeld