Wegraping: 'Nou is dit terug na die Skrifte'
2011-05-24 09:10
Pretoria - Nou is dit terug na die Skrifte toe om te gaan kyk waar hulle dit verkeerd verstaan het. Hulle moet hulself deur die Skrif laat korrigeer.
Só gesels Johannes Coetzee, wie se boodskap dat daar op 21 Mei ’n groot aardbewing en wegraping van gelowiges sou wees, die afgelope naweek verkeerd bewys is.
’n Merkwaardig opgewekte Coetzee het Maandag gesê hulle is teleurgesteld, maar dit gaan steeds goed.
Hy meen mense wat soos hy dink, is nou in ’n soortgelyke posisie as wat Jesus se dissipels was toe Hy gekruisig is terwyl hulle verwag het Hy sou koning word.
Hy erken ruiterlik dat hulle verkeerd was en vra om verskoning daarvoor, maar sê dit was net met sekere aspekte, soos die wegraping en aardbewing.
Hy is steeds oortuig dat daar iets baie belangriks in die gees gebeur het.
Daar het ’n enorme wêreldwye proklamasie plaasgevind dat die einde naby is.
Hy verwys na die gelykenis van die vyf wyse en vyf dwase maagde waarin daar gesê word die bruidegom het getalm. Hulle probeer nou peil waarom Hy talm.
Coetzee bly egter oortuig dat die finale einde van die wêreld op 21 Oktober gaan aanbreek en, soos hulle van die begin af voorspel het, dat dit dan met vuur en swael verteer sal word.
Hy is baie ontsteld oor die suggesties dat hulle nie hul rekeninge sou betaal nie. Hy sê hul hotelrekening en elke ander rekening is volledig vereffen.
Hy is ook nie nou in ’n penarie dat hy sonder kos of komberse sit omdat hy al sy geld aan sy veldtog bestee het nie. Hy is dalk materieel nou swakker daaraan toe as vroeër, maar hy het nou skatte in die hemel wat hy vir geen geld ter wêreld sal verruil nie.
Daar word nou vir hulle gesorg, sê Coetzee. Hy wil geen ander God dien nie.
Terug kerk toe sal hy egter nooit nie. Hy beleef die ergste veroordeling en spot juis van kerkmense.
- Volksblad