Weghol-veldbrand woed in sterk wind in Boland
2012-01-10 09:06
Kaapstad – Brandbestryders spook reeds drie dae om ’n weghol-veldbrand naby Wolseley in die Boland te blus.
Die brand, wat sedert Saterdag in die omgewing woed, word deur ’n sterk wind aangeblaas.
Meer as 100 brandweerbeamptes van die Kaapse Wynland-distriksmunisipaliteit, die Drakenstein-munisipaliteit en vrywilligers het teen gisteraand steeds die brand, wat in die rigting van Tulbagh gedraai het, beveg.
Vyf helikopters word ook sedert Sondagoggend gebruik om water op die vlamme te gooi.
Mnr. Roysten Harris, stasiebevelvoerder van die Kaapse Wynland-distriksmunisipaliteit se brandweerdienste, het gister gesê dit brand aan albei kante van die Hawekwaberge in die Wolseley-omgewing.
“Die brand woed tans aan die Wolseley kant en aan die kant van die Voëlvleidam.
“Vroeër het dit naby die huise gebrand, maar geen eiendom is beskadig nie.”
’n Paar inwoners is vir rook-inaseming behandel, terwyl sowat ses brandbestryders ligte brandwonde opgedoen het. Hulle is op die toneel behandel. Geen ernstige voorvalle is aangemeld nie.
“Dit brand oor ’n groot gebied en die wind help ook nie veel nie. Altesaam 120 beamptes met 15 brandweerwaens beveg die brand.
“Vandag was dit 32°C en môre is dit 33°C. Ons verwag nog ’n harde dag.
“Beamptes sal regdeur die nag op die toneel wees om die brand te probeer blus,” het hy gesê.
Daar kon nog nie vasgestel word wat die brand veroorsaak het nie.
– Volg Nuus24 op Twitter.