Weeskinders se moordenaars nog op vrye voet

2012-08-20 12:30

Johannesburg – Die soektog na diegene wat verantwoordelik is vir die moord op drie kinders in Naboomspruit, duur voort, het die polisie in Limpopo gesê.

Brig. Hangwane Mulaudzi sê die polisie is nog op soek na twee seuns en ‘n meisie se moordenaars. Die kinders se lyke is Saterdag gevind.

Die kinders is as vermis aangemeld nadat hulle nie na die Montadi-sorgsentrum vir jeugdiges, waar hulle gewoon het, teruggekeer het nie.

Bafana Kekana (9), Hosea Richard Kekana (10) en Johana Kekana (12) is Woensdag laas by die Dikobo-laerskool gesien tydens ‘n optog waarin betogers op meer onderwysers aangedring het.

‘n Verbyganger het die lyke naby die Constantia-oord gevind.

Hul hande en voete is met skoenveters vasgevind.

Hulle is met klippe doodgegooi en die meisie is verkrag voor sy vermoor is.

Volg Nuus24 op Twitter    

- SAPA