“Wees versigtig met lied” – ANC
2010-04-07 12:51
Johannesburg – Die ANC het Woensdag ‘n verklaring uitgereik waarin hulle die kwessie rondom Dinsdagaand se vergadering opgeklaar het.
“Die ANC het soos gewoonlik Dinsdagaand hulle weeklikse vergadering gehou by die president se amptelike woning in Pretoria.
“Daar is besluit dat weens die huidige klimaat in Suid-Afrika, alle strukture binne die ANC hulself moet terughou. Die strukture is versoek om nie aan enige publieke debat deel te neem oor die dood van Eugene Terre’Blanche nie,” het die party in ‘n verklaring gesê.
Volgens Gwede Mantashe, sekretaris-generaal van die ANC, is die party se interne strukture versoek om “versigtig te wees wanneer hulle struggle liedere sing wat woorde bevat wat sal bydra tot rasse-polarisasie in Suid-Afrika”.
“Ons versoek aan ons lede word ondersteun deur die feit dat ons ‘n verantwoordelikheid het om te verseker dat hulle nie gebruik word as ‘n sondebok vir ander agendas nie.”
Die ANC het dit egter duidelik gemaak dat hulle nie struggle liedere verban nie, insluitende die omstrede ‘Skiet die boere’-lied. Na bewering sal die party se nasionale uitvoerende komitee (NUK) tydens hulle volgende vergadering wat tussen 14 en 16 Mei sal plaasvind die debat rondom sommige van hulle liedere bespreek.
Die historiese waarde en impak van die lied moet egter in ag geneem word.
“Tot op hede het die ANC nog niks uitgevra oor die feit dat ‘n 15-jarige plaaswerker betrokke was by die wrede moord van Terre’Blanche nie.
“Ons het ook nog niks gesê oor die feit dat sommige dele van die media die kwessie ignoreer dat sommige mense nie hulle lone ontvang nie. Ons vind dit ook vreemd dat sommige mense ‘n politieke kwessie maak van iets wat duidelik ‘n kriminele saak is,” het Mantashe gesê.
Mantashe het ook gevra waarom die media nie soveel aandag aan ‘n storie gee waartydens ‘n swart jagter deur ‘n boer doodgeskiet is nie. Die boer is glo op R5000 borgtog vrygelaat.
“Ons bevraagteken die objektiwiteit van die media.”
Luister hier na 'n klankgreep van die radio-onderhoud
- Sapa