Weermag waarsku Malema

2012-09-14 18:39

Johannesburg – Die Suid-Afrikaanse Nasionale Weermag (SANW) het die geskorste leier van die ANC-jeugliga, Julius Malema, gewaarsku om nie by sy sake in te meng nie.

“Die militêre bevelvoerder wil graag vir mnr Malema, of enige ander persoon, waarsku om nie by die bestuur van die SANW in te meng nie. Ons is ‘n instansie waar die hoogste standaarde van dissipline gehandhaaf word,” het Xolani Mabanga, brigadier-generaal, in ‘n verklaring gesê.

Die waarskuwing kom nadat Malema Woensdag sowat 60 soldate by die Lenasia-ontspanningsentrum in Johannesburg toegespreek het.

Malema het die land se politieke leiers gekritiseer en hulle daarvan beskuldig dat hulle nie na die belange van SANW-lede omsien nie.

Mabanga het ook gevra dat die SANW nie by politieke gevegte betrek word nie.

“Die SANW... kan nie gebruik word om enige politieke party of organisasie te bevorder nie.”

Mabanga het bygevoeg dat inmenging by die SANW as ‘n misdaad hanteer kan word.

– Volg Nuus24 op Twitter
 

- SAPA