Weermag moet inspring oor tekort aan verpleegsters
2012-01-30 11:02
Johannesburg – Die Suid-Afrikaanse Nasionale Weermag (SANW) se mediese span is ontplooi om by die Chris Hani-Baragwanath Hospitaal uit te help weens ‘n tekort aan verpleegsters in die neonatale eenheid.
Die vyf teater-verpleegsters van die weermag is vroeër vandeesmaand ingeroep nadat gefrustreerde dokters die departement in kennis gestel het van ‘n tekort aan werkers in die neonatale eenheid, het The Star berig.
Nietemin het die uitvoerende hoof van die hospitaal, Johanna More, ontken dat daar ‘n tekort aan personeel is en het gesê dat die hospitaal slegs proaktief is.
‘n Bykomende 43 kraamverpleegsters is aan die begin van die jaar in diens geneem, het sy gesê.
Die departement van gesondheid was nie bewus van berigte oor ‘n tekort aan personeel nie.
Simon Zwane, woordvoerder, het alle kommentaar na More verwys, wat nie onmiddellik beskikbaar was vir kommentaar nie.
– Volg Nuus24 op Twitter
- SAPA