Weermag het groot tekort aan medici
2010-06-17 08:24
Pieter du Toit
Kaapstad – Amper 40% van mediese offisiersposte vir dokters en spesialiste by die weermag se drie militêre hospitale in Pretoria, Bloemfontein en Kaapstad is vakant.
Daar is ook ’n ernstige tekort aan aptekers, sielkundiges en fisioterapeute in uniform, het Lindiwe Sisulu, minister van verdediging, in antwoord op ’n parlementêre vraag van Donald Smiles (DA) gesê.
Daarvolgens is daar 9823 poste in die Suid-Afrikaanse Militêre Gesondheidsdiens (SAMGD), waarvan 27% nie gevul is nie. Benewens dokters en spesialiste sluit dit paramediese beroepe soos radiografiste en steunpersoneel soos administratiewe beamptes en skoonmakers in.
Volgens Sisulu word daar ruim gebruik gemaak van dokters wat van buite die SAMGD vir spesifieke doeleindes ingekontrakteer word – in Bloemfontein maak dié dokters meer as die helfte (32 uit 58 aan diens; daar is 42 poste) uit van dokters wat in 3 Militêre Hospitaal aan diens is.
By 1 Militêre Hospitaal in Thaba Tshwane, Pretoria, is daar 188 poste waarvan 65 vakant is en by 2 Militêre Hospitaal in Wynberg, Kaapstad, is 30 van die 79 poste leeg. Al drie hospitale het ’n tekort aan aptekers (1 Mil met 9 uit 25 poste, 2 Mil met 3 uit 10 en 3 Mil met 2 uit 7). Verpleegpersoneel, sielkundiges (1 Mil moet 12 hê, maar het slegs 4) en fisioterapeute is ook in aanvraag.
Luidens Sisulu se antwoord wil dit ook voorkom of die onderhoud van die hospitale se geriewe ’n uitdaging is: In Wynberg is albei opsigtersposte leeg terwyl Bloemfontein se vier poste ook nie gevul is nie.
Smiles het gesê: “Die duidelike tekort is kommerwekkend omdat daar van ons soldate verwag word om te alle tye paraat te wees.
“Hier erken die minister egter alles gaan nie klopdisselboom nie. Die tekort wat by die SAMGD bestaan, beteken ons soldate is nie fisiek en psigies in die beste toestand wat hulle kan wees nie.”
Helmoed-Römer Heitman, ’n verdedigingskenner en korrespondent vir Jane’s Defence Weekly, het gesê die SAMGD gaan al ’n tyd lank gebuk onder die verlies aan kundigheid. Dit kan grootliks toegeskryf word aan aanstellings op grond van ras, beroepsgeleenthede buite die weermag en “’n algemeen onaangename werkatmosfeer”.
- Volksblad