Weermag gereed om polisie te help
2010-07-13 09:40
Johannesburg - Die weermag is landwyd op ’n gereedheidgrondslag om die polisie te help nadat sporadiese voorvalle van xenofobiese geweld Sondagaand in die Wes-Kaap uitgebreek het.
Tog het pres. Jacob Zuma Maandagmiddag op ’n nuuskonferensie in Sandton volgehou daar is geen bewyse om die gerugte dat buitelanders ná WB 2010 verdryf gaan word, te staaf nie.
“Ek dink nie ons moet gerugte aanvaar as die werklikheid nie. Daar is geen konkrete bewyse nie. Dit sal snaaks wees om te dink aan die een kant verwelkom ons mense van oor die wêreld en aan die ander kant gaan ons hulle aanval,” het hy gesê.
Zuma het wel erken sommige buitelanders het weens die dreigemente oor xenofobiese geweld voor eergisteraand se eindstryd gevlug. Hy het egter gesê “die mense moenie vrees nie”, want die regering is in beheer.
Intussen is soldate Maandag saam met polisiebeamptes in verskeie townships in die Wes-Kaap ontplooi en die departement van verdediging het bevestig dieselfde strategie sal elders geld sou die geweldpleging na die res van die land versprei.
Nathi Mthethwa, minister van polisie, en Lindiwe Sisulu, minister van verdediging, het vroeër die oggend in Kaapstad aangekom om self inligting te kry oor veral Somaliërs wat die vorige aand in Philippi, Nyanga, Kruispad, die Paarl en Wellington aangeval is.
“Die blote feit dat albei ministers vanoggend hier was om met die veiligheidshoofde te vergader wys hoe ernstig hulle die situasie opneem,” het Ndivhuwo Mabaya, Sisulu se woordvoerder, gesê.
Ook Mabaya en Zweli Mnisi, Mthethwa se woordvoerder, het volgehou die voorvalle word deur “misdadige elemente” aangehits en is nie noodwendig xenofobies van aard nie. Volgens Mabaya toon die weermag se ontledings dat “gewone Suid-Afrikaners” nie wrokkig teenoor buitelanders is nie en dat dit eerder misdadigers is wat hul kwesbaarheid uitbuit.
“Dit is misdaad onder die dekmantel van xenofobie,” het Mnisi gesê.
Hoewel sommige buitelanders in Gauteng ’n herhaling van 2008 se geweldpleging vrees, was daar teen druktyd geen ernstige voorvalle nie. Heelwat polisiebeamptes is wel vroegoggend in die Ramaphosa-plakkerskamp aan die Oos-Rand ontplooi.
Nataniel Mohale, gemeenskapsleier, het gesê ’n Mosambieker se winkel is Sondagoggend aan die brand gesteek. “Die man is nie beseer nie. Verder was daar nie voorvalle nie.”
Die polisie en ’n plaaslike raadslid, Jake Bennett, het Sondagmiddag met die gemeenskap vergader om die gemoedere te kalmeer.
Daar was teen druktyd geen voorvalle in ander provinsies nie, maar die ANC en die vakverbond Cosatu het wel hul kommer uitgespreek.
Brian Sokutu, ANC-woordvoerder, het gesê die party voer gesprekke met gemeenskapsleiers op grondvlak.
Volgens Parick Craven, Cosatu-woordvoerder, hou die voorvalle in die Wes-Kaap ook verband met swak dienslewering en “haal inwoners hul frustrasies op buitelanders uit”.
* Tot 60 mense is vermoor en 40000 is dakloos gelaat toe xenofobiese geweld in Mei 2008 in Alexandra, Johannesburg, uitgebreek en twee weke lank oor die land heen gewoed het.
- Volksblad