Weermag-aanstellings ondersoek
2010-09-14 07:41
Pretoria - Die weermag het ’n raad van ondersoek belê na die beweerde onreëlmatige aanstelling van reserwemagsoldate sonder enige militêre kwalifikasies.
Die ondersoek kom nadat Volksblad van die aanstellings reeds meer as drie maande gelede teenoor die weermag bevraagteken het.
Die aanstelling van een man as sersant is glo deur sy suster, wat ’n senior offisier in die leër is, goedgekeur.
Nog ’n geval is ’n vrou wat as adjudant-offisier aangestel is.
Die twee verdien elk tussen R10 000 en R14 000 per maand, sonder dat hulle enige militêre opleiding of ondervinding het.
Siphiwe Dlamini, hoofwoordvoerder vir die weermag, het vandeesweek gesê die beweerde onreëlmatighede word in ’n baie ernstige lig beskou.
Daarom is besluit om die saak deeglik te ondersoek voordat besluit kan word oor die vervolging van weermagpersoneel wat moontlik betrokke is.
Die senior offisier wat glo haar broer aangestel het, is in beheer van loopbaanbeplanning by een van die leër se afdelings.
Die broer is in Mei vanjaar in ’n vakante pos van ’n eenheid in Potchefstroom aangestel, maar hy “werk” in Pretoria.
Hy dra nie uniform nie en is glo omtrent nooit op kantoor nie, maar ontvang getrou elke maand sy soldy. Volgens dokumente was sy suster se handtekening die laaste een wat sy aanstelling finaal goedgekeur het.
Die broer werk ook nou in dieselfde afdeling as sy suster. Volgens ingeligtes is die soldate in dié afdeling te bang om teen sy aanstelling beswaar te maak, omdat hulle reeds gedreig is dat hul loopbane in die gedrang sal kom as hulle durf praat.
Sy het glo vir een gesê sy kan sy loopbaan “breek” as sy wil.
Intussen vul die broer ’n pos terwyl verskeie korporaals reeds jare lank op bevordering verwag.
Die adjudant-offisier werk in die leër se hoofkwartier. Sy is in Junie vanjaar ook as reserwemaglid aangestel, terwyl dié pos nêrens eers intern geadverteer is nie.
Daar was dus geen ander aansoeke, onderhoude of kortlyste, soos deur die riglyne vir aanstellings vereis word, voordat sy aangestel is nie.
Die sersant en die adjudant-offisier word onderskeidelik in administratiewe poste in personeelaangeleenthede en logistiek aangewend.
- Volksblad