Weduwee kry R3,7 milj ná man sterf
2010-02-25 12:07
Pretoria - Die Noord-Gautengse hooggeregshof het Donderdag 'n eis van R3,7 miljoen aan 'n weduwee wie se man in 'n ongeluk dood is, toegestaan.
Trish Phillips (38) het 'n eis by die Padongelukkefonds ingedien ná haar man, Trevor, in April 2007 in 'n kop-aan-kop botsing dood is.
Mnr. Phillips was omstreeks middernag saam met 'n kollega op pad huis toe ná 'n werksfunksie toe 'n ander voertuig skielik voor hulle ingery en met hulle gebots het.
Mnr. Phillips en sy kollega is op slag dood.
Die bestuurder van die ander motor is skuldig bevind aan nalatige bestuur. Hy beweer sy aandag was oombliklik afgetrek toe die ongeluk plaasvind.
Die Phillips-egpaar het drie kinders wat ten tyde van die ongeluk tussen een en nege jaar oud was.
– Nuus24