Webwerf ’n ‘verleentheid vir NG Kerk’
2010-01-28 07:36
Neels Jackson
Pretoria - Die NG Kerk het besluit om alle skakels na die Kletskerk van sy webwerwe te verwyder omdat dié webwerf vir hom ’n verleentheid geword het.
Dit volg op klagtes uit die kerk oor onsmaaklikhede wat op dié internet-gespreksforum verskyn het.
Jean Oosthuizen, redaksielid van die Kerkbode, bedryf die Kletskerk in sy private hoedanigheid. Dis ’n forum waar Christene en ateïste eerlik met mekaar gesels. In die proses word kru uitsprake soms gemaak.
Prof. Piet Strauss, moderator van die algemene sinode, het gister gesê die NG Kerk het homself al vroeër van die Kletskerk losgemaak, maar nou besluit om ook die skakels daarheen van al sy webwerwe te verwyder.
“Ons steun nie die Kletskerk nie,” het hy gesê.
Op Kletskerk self was daar gister al kritiek van mense wat daarop wys dat die NG Kerk vroeër met “ 'n seisoen van luister” begin het, maar nou nie die stemme op Kletskerk wil hoor nie.
Oosthuizen self het op Kletskerk gevra hoe die kritici die woorde van die kerk se luisterlied verstaan. Dit lui onder meer: “Ek wil hulle hoor wat op my buitekring bly staan waar vreemde stemme hul bekoor. Gee my ’n oor vir die soekstem van ons tyd...”
Strauss het gesê die debatte op Kletskerk is op so ’n lae peil dat die NG Kerk nie daarna hoef te luister nie.
Sulke debatte kan volgens Strauss niks vir ’n kerk van die Woord en die kerk van die Here beteken nie.
Daaroor het Oosthuizen gesê as iemand sê die peil van debatte op Kletskerk is laag, is hy duidelik nie op hoogte van wat daar aangaan nie.
Dis juis een van sy frustrasies dat mense Kletskerk kritiseer sonder om regtig te weet wat daar aangaan.
Oosthuizen het toegegee daar verskyn ook “gemors” op Kletskerk, maar het gesê dis maar die aard van ’n webwerf.
Daar is ook debatte van hoë teologiese gehalte waaraan mense met hoë teologiese kwalifikasies deelneem.
Oor Oosthuizen se posisie as werknemer van die NG Kerk het Strauss gesê hy kan voortgaan om die Kletskerk in sy persoonlike hoedanigheid te bedryf.
Hy het egter gesê daar moenie ’n teenstrydigheid wees tussen ’n werknemer van die kerk se optrede na binne en na buite nie.
Dit kan gebeur dat die saak van Oosthuizen se posisie as werknemer op die kerk se agenda beland.
Oosthuizen het gesê nie een kerkleier het nog met hom daaroor gepraat dat sy optrede na binne en na buite in stryd met mekaar sou wees nie.
Hy is nog net bedank vir die werk wat hy doen.
Op Kletskerk self het ’n deelnemer dit as ’n bedekte dreigement bestempel dat die moderatuur sê daar word van personeel van die kerk verwag om debatte “binne die etos van die NG Kerk te hanteer”.
- Die Burger