Waterkrisis sal SA nie tref, sê departement
2010-10-02 06:35
Johannesburg – Die departement van waterwese sal sorg dat geen waterkrisis Suid-Afrika tref nie.
Enkelinge, vakbonde en nie-regeringsorganisasies (NRO’s) wat meen die land stuur op ’n waterkrisis af, wil net geld uit die situasie maak, het Nobubele Ngele, waarnemende direkteur-generaal van waterwese, eergister in ’n verklaring gesê.
Ngele het gesê sy beskou die dreigement deur die Suid-Afrikaanse vakbondfederasie Fedusa dat hy oor aspekte van die land se watergehalte gaan staak, as “bisar”.
“Hoewel die departement van waterwese alle vakbonde se reg om te staak erken, wil ons ook waarsku teen opportunistiese groeperings en enkelinge wat munt uit mense se vrese wil slaan.”
Sy het NRO’s daarvan beskuldig dat hulle mense bangpraat in ’n poging om finansiering vir hul organisasies te verseker.
Met verwysing na die bedreiging wat suur mynwater vir die Witwatersrand en Mpumalanga inhou, het Ngele gesê dit is “jammer” dat opportunistiese groepe nou op dié wa klim in ’n poging om hul eie “opportunistiese private belange” te bevorder.
Die regering is heeltemal in beheer van hierdie situasie, het sy gesê.
Buyelwa Sonjica, minister van waterwese en omgewingsake, het reeds ’n taakspan aangestel om na dié bedreiging te kyk. ’n Interministeriële komitee en ’n paneel kundiges sal binnekort (moontlik teen middel Oktober) hul bevindings daaroor bekend maak.
Sy het dit beklemtoon dat ’n waterkrisis Gauteng nie in die gesig staar nie en dat die provinsie ook nie binnekort ’n krisis sal ervaar nie.
“Gauteng het ’n waterstelsel van wêreldklas en dit word ondersteun deur water wat van KwaZulu-Natal en Lesotho ingevoer word. Die water word tot wêreldstandaarde gesuiwer.”
Die departement se beplanningspanne beplan voortdurend ver in die toekoms in sodat hulle kan verseker dat stede en dorpe nooit sonder water sal wees nie, het sy gesê.
Pam Yako, voormalige direkteur-generaal van waterwese, het twee jaar gelede by ’n internasionale waterberaad gesê Gauteng gaan reeds in 2012 ’n ernstige tekort aan skoon water ervaar.
- Volg Nuus24 op Twitter.
- Volksblad